本文重點
今年農曆年初一碰啱情人節，太子見到恒隆地產（00101）執行董事吳士元（Terry），問佢點同老婆慶祝，Terry話自己並非浪漫之人，拍拖到結婚至今都無慶祝過情人節，亦無喺情人節送花畀老婆，所以老婆都對佢詐型。
畀錢揸手好過送花
Terry有無諗過今年畀個Surprise（驚喜）愛妻，送番束花畀老婆嘅呢？點知Terry笑笑口咁話「唔好搞壞規矩」，仲講不如實際啲，出咗花紅後過啲錢畀老婆揸手仲好，仲笑言「我啲錢咪即係佢啲錢囉！」
Terry又講笑話屋企係「母系社會」，好多嘢都由老婆揸Fit。不過，佢同老婆一齊咁耐，除咗生日會食餐飯送吓小禮物外，其他節日都無乜特別慶祝，即使係佢哋嘅結婚周年，撞啱又係佢個大女生日，好多時都變咗同個女慶祝生日。至於今年年初一會點過？佢話會同阿媽、阿哥及老婆等一家人吃飯。