奧巴馬似乎要將○八年金融海嘯，同被妖魔化的投資銀行家畫上等號。筆者就認為，唔通嗰班無咁大個頭卻學人戴頂大帽，走去借錢炒樓嘅就無責任？而貪得無厭罔顧風險的按揭銀行家，其實同樣係金融海嘯的始作俑者，今次奧巴馬計劃立例限制金融業發展，打擊彰顯美國國力的華爾街銀行，結果係點，未來一個月法案呈交國會審議自有定斷。

當年支持奧巴馬選總統的股神巴菲特，已表態反對向銀行業設限，短期支持及反對雙方的角力，又會有好戲睇矣。

港股料有技術反彈

外圍偏軟，市場又擔心周末人行「做嘢」，市場虛怯的信心，在周五早市表露無遺，恒指最多跌過612點去到20,250點，為去年十月以來的新低。其後內地A股及內銀股反彈，令指數跌幅收窄至136點，收報20,726點，中資金融股比重更高的國企股指數，更收復失地，倒升17點收市，報11,975點，成交在V形反彈下衝破千億，去到1,041億元。大市短短兩星期跌去2,422點，幅度超過一成，除非外圍走勢持續差劣，否則短期應該先有一次技術反彈，目標有機會介乎20,738點至10日線的21,587點之間。

相信最多人會問，今次回吐後，邊類股票最啱撈底？基於內地收緊銀根的行動，可能會持續一段時間，市場估計最遲可能到第三季人行先會加息，相信落實加息前這段時間，利率敏感的內房與內銀股，仲係橫行或者尋找支持的可能性比較大，反之，國策要推動消費平衡出口減少的損失，一些較落後的內需股，會是筆者首選。

市佔率呈上升之勢

運動品牌361度（01361），可放入落後股的名單之中，尤其最近營運表現唔錯，睇番運動服第一二把交椅李寧（02331）及安踏（02020），公布的一○年度首兩季同店銷售，只有單位數字升幅，361度管理層公布的營運指引，顯示第三及第四季同店銷售增長率，卻有15%及17%，反映這市場份額較低的品牌，市佔率有上升之勢。

361度股價一周前創出歷史高位6.34元，昨收5.43元，調整一成五，以證券行預測的一○年市盈率，只係11.4倍，論估值比李寧的24.4倍、安踏21倍、中動向（03818）17.9倍，甚至另一大落後的寶勝（03813）的12.8倍都要便宜，趁市況調整執平貨，361度是唔錯選擇，下周如果仍在5.3至5.5元，值得一試。