本文重點
呢段日子財經圈有唔少年度選舉，公布舊年嘅成績，國際權威財經雜誌《Euromoney》，就公布咗最新年度亞洲最佳管理及管治公司評選結果，結果中電信（00728）同時獲評選為中國最佳管理公司第一名，同埋亞洲最佳管理公司嘅第一名，至於向來做開「一哥」嘅中移（00941）响呢兩個選舉中，只係屈居第二。
中移跌落亞洲第二
此外，中電信仲獲選亞洲最佳企業管治獎、最令人信服企業策略獎同管理層最樂於與資本市場溝通獎添，都咪話唔巴閉。中電信老總王曉初對於公司獲評為亞洲最佳管理公司，認為係對公司同全體員工嘅一個重大鼓舞，並感謝投資者支持同上下各級員工嘅努力。
內地電訊商向來都較其他企業「乖」，不過早前中移有高層因涉嚴重經濟問題而被免職，之後又傳出聯通（00762）亦有高層被牽連，好似得番中電信未有負面傳聞，呢個時候獲獎都算為中資電訊商爭番一些分數。