睇番恒指走勢圖，21,000點係近幾個月嘅橫行區底部，已成重要心理支持位，故見昨日恒指失守21,000點，沽壓明顯增加，期指跌勢尤急，反映唔少投資者都嚴守紀律，跌穿支持位便有所行動。

放大圖片	放大圖片	放大圖片

下周俄羅斯鋁業（00486）及南戈壁能源（01878）在港上市，前者全配售，所以唔使點憂；後者聽聞亦獲超額認購，故跌市對二者上市計劃影響不大。

油價回落助盈利

近日陸續有內地航空企業發出「盈喜」。除南航（01055）預告去年度業績虧轉盈後，國航（00753）亦表示，預期去年度業績虧轉盈，主要係受惠客運業務回暖趨穩，特別係內地市場穩定增長，加上去年國際原油價格水平低於前年，令公司嘅燃油採購支出同比下降，其他成本亦得到有效控制。

此外，去年油料套期公允價值回轉，以及去年上半年民航建設基金返還，亦對業績有正面影響。難怪大市連日低收，但航空股昨日卻逆市偏強，東方航空（00670）升2.8%、南方航空升2.5%、國航更升5.5%。

過去一周，國航股價突破了十二月以來嘅阻力位6.2至6.3元水平，昨日遇上跌市，股價仍能高收，成交2.85億元，反映買家具實力。展望今年，國際油價走勢穩中有升，但如先前大升嘅條件不存在，國內航線喺內地繼續打「內需」牌之下維持強勁，而國際航線亦會出現較大增長。國航嘅國內、外航線較平均，營運效益亦係同類股之冠，若睇好行業復甦，國航可視為首選。