位處100樓 環迴海景

新地起嘅環球貿易廣場（ICC）好快就落成，成為全港最高嘅建築物，有88層樓高嘅國金中心，即刻變阿二。尋日新地副主席郭炳聯就同太子介紹咗觀景台嘅特色，同埋比賽嘅細節。佢話新地希望呢個觀景台成為本港新地標，吸引多啲世界各地嘅遊客來港。

據講，ICC嘅高度係海拔490米，觀景台會喺ICC第100層，面積約3萬平方呎，高度係海拔393米，之上係酒店，100樓以下係商業樓層，由二樓坐上去100樓，只須60秒，喺觀景台可以360度咁欣賞維港兩岸景色。

評審團有郭炳聯、田北俊、靳埭強等等嘅專業人士！

馬雲派花紅賞罰分明

阿里巴巴（01688）主席馬雲喺飛機上面寫加薪方案，他提到今年公司會特別突出「賞罰分明」，同埋要打破大鍋飯同平均主義，所以今後年終獎唔會再同工資掛鈎，而係根據員工對公司嘅貢獻分配。馬雲仲話會將發放獎金嘅原則放喺內聯網，等員工知道自己嘅獎金為咩會多咗或少咗。

加人工方面又點呢？馬雲預期今年通脹難免，所以決定繼續加人工，而且會加得唔少，至於加薪政策就會繼續向員工傾斜，副總裁或以上職級不會參與加薪。馬雲能夠做到公平、公正，確係阿里員工之福！