中國銀監主席劉明康澄清無要求內地銀行在一月份剩餘時間內停止再放貸的報道，但對中港兩地股市並無太大振奮，港股再插391點。前日股市喜氣洋洋的氣氛一掃而空，到底誰是跌市元兇，魚缸傳聞多多。人行剛發行一批一年期票據，因為息率又再比前次高8個點子，惹來加息疑雲；尋日午市傳聞講到似層層，話周四、五人行會出招，更話今次唔單止加存款準備金率，人行會直接加息，好友聽到暈得一陣陣。
撇除樓價，查實內地整體居民消費物價，即係我哋叫CPI，表現仲係溫和，上年十一月份數字只係升0.6%，當中頗大部分來自受季節性因素影響向上的食品價格（○八年同期基準也較低），非食品價格依然係負數，人行係咪急成咁要加息，筆者認為機會好微，反而針對樓價及銀行年初過分濫借的措施，應該會陸續有來。大體上，內銀同內房股，短期仲係少掂為妙。
港股後市易跌難升
至於港股，即使熱錢唔係一窩蜂湧出，但不能否定正在減少當中，執筆時美電又創年半新高見7.7622，銀行體系結餘由5,000億縮水到得番2,500億，在中美抽緊銀根，港元區資金流出的客觀條件下，後市上23,000點難，跌穿21,000點容易。
中國國航（00753）發盈喜，預測○九年業績虧轉盈，主要多得客運業務復甦，以及燃油採購成本，遠比○八年低。
睇番國航第三季未經審核業績賺8.85億元（人民幣．下同），累積三季則賺38.1億元，如無意外，全年業績在40億樓上，對連同A與H股，市值1,260億港元計算，值唔值得買卻是見仁見智，事實已證明內地航空業對抵禦經濟及油價波動之能力相當低，假如沒有人民幣持續升值，變相令外債減少，擠出會計上的匯兌收益填氹，實質盈利表現一般而已。
受惠人民幣升值
第三季國航每股股東資金1.99元，以H股現價6.48港元計，市帳率2.86倍，睇番過去五年市帳率介乎0.53至5.1倍，因此，估計國航股價的高峰未出現，但盈喜威力肯定不及人民幣升值預期，假如年初外匯儲備增速加快，外資直接投資數字又理想，捧場客一動不如一靜，不妨坐享其成。