本文重點
正所謂十年河東、十年河西。眼見亞洲區經濟咁旺，西方老字號錢莊亦紛紛向東方進發。大笨象滙控（00005）將個行政總裁辦公室遷來香港，而喺海嘯中重傷嘅花旗銀行就邀請咗前大摩亞洲區主席文禮信（Alasdair Morrison）加盟，仲為佢度身訂造咗個新位：亞洲區高級顧問。佢亦會加入花旗嘅資深策略顧問小組。
教路開拓亞洲
呢排班「賓卡」因為巨額花紅而搞到好頭痕，不過今次花旗可以請到文禮信出山，就意義非凡，皆因呢位高級顧問嘅經驗真係有錢都買唔到。佢除咗係前大摩亞洲區主席外，仲係前怡和大班，喺怡和做咗二十八年咁耐。可惜，佢○七年離開咗大摩後靜咗好耐，今次出山重投投行前，佢就身兼商交所非執行董事。
有中環老友就話，文禮信嘅人脈關係好，相信有助花旗嘅業務。咁又係呀，文禮信喺香港同大陸工作咗三十幾年，可謂「中國通」。佢○七年毅然離開大摩，當時就有江湖傳聞話，文禮信係因為對未來有其他規劃，例如佢希望可以跑遍五大洲。喺參加咗佢太太間戶外探險公司組織嘅超長馬拉松比賽後，佢又想挑戰戈壁灘。