上周五美股受銀行股急挫拖累下跌，估計今日港股都係凶多吉少。志強仍有持倉，若然港股跌勢過急，或者要先行止蝕離場。港匯下跌，市場憂慮有資金流走，不過睇番上星期，平均成交都係800億元左右，假如大戶真係沽貨離場，成交應該明顯增加，估計都係跌市，搵個藉口解釋啫！
靜咗一輪嘅證券股，上周五失驚無神炒上，因為較早前已證實其控股股東新創建（00659）曾洽售控股權的大福證券（00665），再有傳聞指有關洽售事宜已談至尾聲，刺激其股價急升26%，帶動整個板塊向上，其他本地證券股亦受追捧。其實內地銀行跟券商，一直有意積極發展香港的證券業務，主要係因為港股流動性大，資金出入靈活，在香港的證券買賣係一門有利可圖的生意，市場對本地證券商自然惹起購併憧憬。
睇番英皇證券（00717），其現價市帳率低於一倍，係被購併的熱門對象之一。雖然去年曾以0.42元配股，但大股東大量認購之後，估計手貨都無流過出街。
而英證每股資產淨值為0.59元，若成為購併對象，其市帳率至少炒高至1.5倍，即0.88元，相當於去年配股價起個孖，現價0.51元上車，大把水位。