本文重點
人民銀行未到虎年先畀市場一個驚喜，上星期提高銀行存款準備金率50點子，為寬鬆貨幣政策打出一個修正球，擔心緊縮措施會接二連三的港股，上周完成四連跌壯舉，周五恒指再跌62點，報21,654點，論走勢弱過藥煲，尤其港元兌美元跌到7.76的一年新低，熱錢流走迹象明顯，擔心後市要試多次21,000點的心理支持。
近期經常見到港股回落，但二三線炒風卻依然的情況，最搶眼肯定係大福證券（00665），被海通證券收購之後，變咗半間「國營」證券公司，管理層放風話準備用大福的平台進軍海外業務，亦借海通打入內地市場，市場憧憬潛力三級跳，股價上周四、五短短兩日，由5.15元抽上7.32元，抽升四成二，認真唔講得笑。阿莊上周五亦以每股50元，掃入5,000股中興（00763）。
近期唔少上市公司趁市旺伸手，但往往有出乎意料表現，好似上星期嘅中興同天津港（03382），只要折讓夠大，大孖沙實行圈起嚟自己玩晒，收穫甚豐。霸王（01338）上市後的禁售期剛過，大股東亦趁好價酌量減一減磅，以每股5.1元批咗2億股出街。
霸王不妨候低收集
去年十一月中霸王由3.5元左右起步，基於貨源實在太乾，炒到聖誕見6.6元，升勢完全無阻力，呈現四十五度完美上升走勢，之後隨着禁售期接近完結，霸王才出現獲利回吐情況。記得股聖彼德林治講過，大股東增持必然係睇好公司之表現，反之批股套現，則未必等同睇淡。單睇上星期五批股後，當日霸王股價在極短時間內從早市貼近批股價的5.15元低位，掃到5.34元收市，較招股價仲有4.7%水位，多少反映接貨者非短癮之輩。
近期人行開始出手抽緊銀根，內銀同內房股等息口敏感股無運行，內需成為熱錢避難的唯一板塊，加上今次配售之後，短期所有不明朗因素一掃而空，假如今日有機會再測試5.15至5.2元的上星期低位，霸王不妨候低收集。