的而且確，以綜合預測藍籌企業一○年盈利計，22,300點的恒指，不過等於14.7倍市盈率，距離歷史危險線的二十倍，仲有相當一段距離。按此推斷，恒指未來一年升到30,340點先至嚟驚都未遲。這種說法基本上無錯，但筆者認為，只適用於投資藍籌股的股民。而目前投機者嘅視線，卻係集中在估值嚴重偏高的礦業、資源、內房及內需股身上，況且恒指市盈率低，部分原因係中移（00941）、中石油（00857）及中石化（00386）等不獲基金歡心的重磅股份PE偏低，拉低整體估值所致。

筆者重申，今日港股未至於去到瘋狂水平，但便宜貨已是買少見少，面前有兩個選擇，一是接受較低的預期回報，否則，較保守的不妨等待回吐出現。

相信唔少人有錯覺，認為工業股今浪屬於落後板塊，然而實際情況是，唔大唔買的基金經理，只選擇性地追逐龍頭股份，君可見一些行業領袖，○八年底至今的升幅驚人，例如全球手提電腦外殼生產巨頭巨騰（03336）升351%，電動工具一哥創科（00669）升340%，手機代工商富士康（02038）升305%，手執LCD顯示器行業牛耳的冠捷（00903）都升124%。

大行給予龍頭待遇

唔知大家有冇察覺到，近年電子產品，例如LED電視及纖巧的手提電話，內置揚聲器（俗稱喇叭）體積愈來愈細，音質好，生產技術要求也自然提高，再唔係中小型土炮廠家所能應付。○五年上市的瑞聲聲學（02018），在行內擁有技術優勢，這可以從集團供應蘋果電腦iPhone及iPod的發聲組件，大客還有諾基亞及黑莓生產商RIM等知名企業可見一二，故包括高盛在內的大行，都將瑞聲視為一線工業股。

考慮到行業佔有率相對低，就增長前景而言，或許瑞聲比富士康更值得享受高PE，儘管一○年市盈率十六倍，就工業股來說似乎稍貴，但綜合市場預測未來三年複合年增長有19%，高估值就有得解釋，如果用過往股市給龍頭工業股的待遇，像全盛時期的德昌（00179）及富士康等，這股票的升浪，應該是有餘未盡。