中外運有破位迹象

眾多股類之中，近期急升嘅航運股，回吐壓力相對細。中海集運（02866）昨日逆市升1.3%，報3.06元；中外運（00598）企穩喺2.2元收市。中外運自去年六月以來，股價一直受制於2.2元水平，惟底部支持卻不斷上移，短期波幅區仍處於1.9至2.2元，但若確認以大成交突破2.2元，將有一番新景象。

周初阿莊話可以留意翻兜機會嘅中國南車（01766），表現令人失望，昨日股價更失守5.2元，收報5.17元，成交增至1.59億元，似乎係有大戶減倉，下一支持位係50日線5.05元，惟有以靜制動。至於周初購入嘅廣藥（00874），昨日一度回吐至6.3元，收報6.37元，跌5%，見6.3元成交甚多，會多坐一會。

唔知大家呢兩日有冇留意到，港交所（00388）股價及交投有異動，已連續兩日單日成交股數突破2,000萬股，昨日逆市升2.3%，報150.5元，成交33.5億元。如此表現實在不尋常。

唔少人都話，上海要走國際金融中心之路，香港金融市場前景堪憂。呢個憂慮固然有理據支持，但講到底，香港喺包括人才及法律等市場基礎建設方面仍具優勢，喺人民幣全面開放之前，香港仍有其獨特市場地位，問題係香港本身有冇好好把握，持續推動發展，以保持競爭能力。

港股市場仍具優勢

還記得去年中，市場一度盛傳「港股半直通車」，之後又傳來廣東省擬向中央爭取支持粵港兩地證券公司開展港股代理交易、合格境內機構投資者業務試點。呢啲建議會唔會開花結果，大家都得個「估」字，但面對今年下半年內地將推「國際板」，或會對投資港股嘅資金源起分流作用，此前「阿爺」會否率先針對港股資金源問題推出新措施，倒值得關注。站喺呢個角度看，相信港交所仍然係投資者不二之選。