元旦假期期間，內地出現驚天大傳聞：中移（00941）有意收購騰訊（00700）。不過，中移發言人已急忙否認，強調公司並無計劃收購騰訊。中移昨日收報72.35元，跌0.69%；騰訊跌0.3%，報168元。國家領導人喺元旦期間「出巡」，並明確表示要落實支持「三農」發展，拉近農村與城市居民收入嘅距離。市場更傳聞，今年首份中央文件即將出台，內容正是新一批強農惠農政策。炒家睇準形勢炒起農業股，第一拖拉機（00038）急升15%，報5.81元；超大現代（00682）升8%，報8.97元；浩倫農科（01073）更急升39%，報1.16元。不過，農業政策一向係內地經濟政策嘅重點之一，唔係咩新興炒作概念，值唔值得高追，當真要三思。
昨日阿莊推介嘅中芯（00981）見異動，高見0.55元，收報0.54元，升8%。阿莊坐言起行，以平均價0.51元買入80萬股。另外，以平均價5.8元買入三萬股上周推介嘅廣州藥業（00874），由於交投唔算多，會睇位再增持。
藍籌股之中，富士康（02038）昨日表現稱冠，收報9.56元，升5.99%，好嘅開始係成功嘅一半。此外，從事垂直整合電子材料製造業務，專注生產覆銅面板嘅建滔積層板（01888），股價亦見異動，可以留意搭順風車嘅機會。
大行睇好行業復甦
近月陸續有大行，包括大和及花旗，就建滔積層板發表報告，評價正面，主要係有見喺「家電下鄉」及「以舊換新」措施支持下，內地家電銷情大旺，有助刺激電子材料嘅需求。事實上，早喺○七年，建滔積層板已成為全球最大嘅剛性覆銅板生產商，市場份額超過一成，可率先受惠行業復甦。
過去兩年，該股因成本問題，被拖低了毛利率及盈利表現，但隨着原料價格趨穩，加上公司旗下兩家新廠已落成，生產上嘅規模效益將有助改善毛利率表現。
去年九月，母公司建滔化工（00148）曾配售建滔積層板舊股，配股價4.92元，該次配售應有助增加股份流通量。再看其股價走勢，昨日收報5.63元，升4.8%，成交額3,644萬元。若能以大成交突破去年九月配股前嘅高位5.82元，可確認大轉勢，中線目標睇7元，止蝕位5元。