本文重點
恒大地產（03333）去年十一月上市後冇放慢發展步伐，個個月keep住有新盤推出，元旦日亦唔放假，推售長沙兩個樓盤，仲請咗香港記者去睇吓佢哋啲樓盤有幾咁搶手。香港傳媒大除夕當日已經飛抵長沙，恒大主席許家印當晚一到埗即刻同傳媒唱K兼倒數，堂堂中國首富開金口娛樂大家，一啲架子都冇。
咪以為年過半百嘅許家印淨係識唱老歌，呢位被大陸記者稱為「最帥的發展商老闆」，唱啲歌不知幾咁新潮，連周杰倫嘅歌曲都琅琅上口，技驚四座。
元旦推盤有原因
恒大今次一月一日推盤咁特別，主要係因為武廣高鐵上月底通車，而佢哋今次推售嘅其中一個樓盤位於長沙高鐵站隔籬。恒大非常重視呢個項目，除咗許家印親自主持開盤儀式，恒大各地方分公司嘅阿頭都有到場。許家印唱完歌就同在場嘅咁多位伙記講，多謝佢哋○九年辛勤工作，令公司順利上市，同班兄弟飲杯。