不過，志強又唔係太擔心，只要係實力股，哪怕短線震盪，過後又重拾上升動力，短線調整仲提供執平貨機會。幾時選股好重要，中航科工（02357）蝕錢蝕到入肉，市值又奀，但何以去年十一月，其股價可以升至3.61元歷史高位，講到尾都係因為母公司財雄勢大，早已表示會向公司注資，所以中航科工股價可以在連續兩年勁蝕逾10億元人民幣之下，去年竟上破○七年高位創新高。

中航科工已落實與大股東中國航空工業集團資產互換，向母公司出售所持的上海A股東安動力及收購深圳A股中航光電權益。中航科工未來或打造為中航集團A股外的資產整合平台，未來三至五年內，中航科工將有機會獲注資1,500億元資產，難怪在虧蝕連年下，股價長升長有。股價在3元附近有支持，現價買，短線目標3.6元，跌穿3.1元止蝕。