假前基金進行粉飾窗櫥活動，中移（00941）高見73元，收報72.85元，升3.5%，半日成交額已達15.7億元，恒指亦順勢被挾高超過300點，收報21,872點，全年累計升幅52%，對比起去年初大家仍身處金融海嘯餘波，心情沉重，到年底能見到如此理想嘅成績，應該感到好滿足！

放大圖片	放大圖片	放大圖片

今年恒指目標升兩成

展望今年，只要全球經濟持續復甦，避過「雙底論」，唔好貪心，今年恒指目標升幅兩成，即係睇26,000點水平，而較大支持則喺18,000至19,000點水平。

針對個別股類，阿莊睇好再生能源、內需及內地保險股，高風險高回報可撈出口相關股。

阿莊今年第一隻推介嘅股票係中芯國際（00981）。查實，以內地政府對中芯嘅支持，阿莊一直對於其翻身未有絕望。只是喺前任管理層主理及不利嘅市場環境之下，即使政府如何支持，公司仍遲遲未能扭虧，令捧場客走吓一個走吓又一個。

不過，去年下半年公司來一個大轉變，就係跟對岸「冤家」台積電達成和解協議，而公司高層亦出乎意料地進行大換班。過去誰是誰非，並非投資者關心嘅問題，更重要嘅係，如今公司新人事新景象，加上已變相引入台積電作為策略股東，喺兩岸經濟進一步融合、新任高層決心整治公司業務及重訂經營策略，加上內地政府繼續支持之下，阿莊對中芯呢鋪「翻身戰」又再重燃希望！