我非常敬重某位投資前輩，佢喺專欄提到送聖誕禮物喎。原來佢一直都有送滙控（00005）股票畀太座嘅習慣，長年累月下，佢太座都攞咗唔少滙控股票。

佢話今年若再送滙控，只係「錦上添花」，決定搞吓新意，改送宏利（00945）股票，希望太座可以長遠分享到股價上升嘅喜悅。老實講，我睇完之後都有積極諗吓之後送股票畀家人。其實呢個理念相當唔錯，因為如果我哋可以運用眼光，挑選到好股嘅話，長遠而言，股價嘅升幅將會相當驚人。我哋一方面既可以表達對家人嘅愛意，另一方面更可以幫佢哋創造財富，大家都不妨考慮吓啦！

心水選體育用品股

講完送禮，講番股市方面嘅消息先。受累美匯指數回升及熱錢流出消息，港股出現明顯調整，相信恒指首個下跌目標會是2萬點左右。

對於下年股市嘅投資主題，大部分專家均將焦點放喺環保節能概念股上。倘若明年中央政府再有政策出台，相信有關股份可以繼續熱炒。惟投資者一定要小心當中風險，時刻留意住公司估值。

個人嚟講，我初步嘅心水係投資內地體育用品股，主要係因為將受惠內需概念及陸續舉辦嘅運動賽事嘛。