港股承接外圍升勢，昨日繼續反彈，可惜彈力略嫌不足，21,400點100日線水平未能收復。不過個股表現卻好番好多，志強都忍唔住手，買咗早兩日叫留意的龍源電力（00916）。早段龍源已承接昨日升勢再高開，以每股9.62元買入，高收9.99元，今日有機會再下一城創新高，志強一於今日食胡，收番份聖誕禮物。
尋日唔少二三線當炒股都成功尋底後反彈，包括航天系股份，而志強過往亦有留意中航工業（00232），股價昨日僅升1.3%，反彈只係剛剛展開。集團今年六月易名，市場一直憧憬公司短期應有業務重組。雖然母公司注入資產仍未有時間表，但系內重組早於年初啟動，同系中航科工（02357）將獲注入1,500億元人民幣資產，並將其業務調整為完整的航空價值鏈，未來可分佔母公司逾五成的資產。
雖然中航科工今次重組撈得最多油水，但母公司尚有逾900億元人民幣資產可分予系內其他公司。目前中航工業市值只有20億元，即使在母公司餘下資產只獲分一成，即90億元人民幣，股價已有條件三級跳。志強相信，其股價一旦能重返0.44元高位，今次可挑戰去年初0.53元水平。