仍留喺股場嘅炒家，每日努力發掘新嘅短炒對象。掛牌冇耐嘅龍源（00916），話咁快又翻炒，昨日高位曾見10.08元，收報9.99元，升5.7%，成交13.17億元，相比起整體市況，此股表現算係相當唔錯。
兩隻新股昨日登場，其中太平洋保險（02601）高位見28.6元，收報28.3元，較招股價微升0.3元；另一隻華昱高速（01823），高位見1.35元，收報1.29元，較招股價升0.01元，二者表現都算不過不失。
紅籌股之中，估值仍然落後嘅為數唔多，廣南集團（01203）係其中一隻。廣南主要從事製銷馬口鐵及相關產品、工業物業發展和租賃、鮮活商品代理及食品貿易，母公司為粵海控股集團。
廣南投資嘅外商獨資企業──中山中粵馬口鐵工業，專門生產經營馬口鐵基板鍍錫薄鋼板、鍍鉻薄鋼板及其深加工產品塗料鐵、印花鐵。
業務可望重拾動力
為配合發展馬口鐵業務嘅需要，公司早喺二○○四年制訂企業五年發展戰略，先後開發建設內地首條具自主知識產權、年產8萬噸嘅電鍍鉻薄鋼板專用生產線，並興建年產15萬噸馬口鐵基板生產線，另與韓國POSCO合作嘅秦皇島中粵浦項（秦皇島）馬口鐵工業，旗下一條年產25萬噸嘅鍍錫鋼板高速生產線亦已投產，公司成功完善了產業鏈，確保原材料供應穩定。
如無意外，未來一年又係廣南制訂下一個五年發展戰略嘅時候。基本上，從今年上半年業績可見，經營情況已較去年下半年有所改善，料全年業績可重拾正軌，經歷過今年嘅整固後，未來將可重展活力。
估值方面，廣南目前市值只是接近資產淨值水平，隨着經營業務產生嘅現金流淨額增加，負債比率由去年底嘅12.1%降至今年底嘅5.6%，假設今年純利重回前年度嘅水平，現價預測市盈率僅單位數字，反映現水平入市風險有限，中線持有揸得安心。再看近三個月股價反覆上揚，走勢對辦，跟進目標上試2元關，穿1.35元止蝕。