Facebook嘅影響力無遠弗屆，太子喺FB都有幾百個「朋友」。玩開FB嘅人都知，聯繫全球除咗靠minigame，各類群組亦好幫得手。明星、名牌等群組可謂司空見慣，但本港上市公司都有群組就認真少見，原來新世界發展（00017）都「潮」得起，喺FB成立咗集團專頁，以文字、相片等形式同大眾分享集團最新資訊。好似佢哋贊助嘅大專生汶川交流團、義工活動等，資料更新好有效率。
呢個群組啱啱開始冇耐，成員尚未過百，但若然集團員工齊撐場，加埋佢哋嘅業務涉及衣食住行，話唔定睇完太子嘅介紹，人數隨時可以翻幾番。
眾所周知，新世界除咗物業業務外，仲有涉足電訊、媒體等範疇，百足咁多爪，開拓溝通渠道認真是明智之舉，加上「彤叔」鄭裕彤追隨者眾，散戶都跟佢抽新股，如果佢都喺FB建立專頁，相信都能吸引唔少人加入。