本文重點
證券商協會日前選舉新主席。太子收到料，有證券界「大姐大」之稱嘅蔡陳葆心個仔蔡思聰獲選為該會新任主席，而英皇證券（0717）董事總經理楊玳詩就被選為其中一名副主席。
證券商協會主席任期一般係一年，但可以再競選連任，最長做三年。現任主席林建興由於太忙，所以不再連任，結果現任副主席之一嘅蔡思聰喺全票贊成下，當選新一屆嘅主席。至於楊玳詩，依家已經係證券商協會董事，所以今次升上做副主席，可謂更上一層樓。
下月為周文耀餞別
證券商協會副主席及永遠名譽會長李君豪，大讚Daisy（楊玳詩洋名），話佢一直好支持證券商協會，出錢又出力，亦好支持業界。
蔡陳葆心一直係證券商協會嘅靈魂人物之一，太子暫時未知佢哋幾時會舉行新一屆就職典禮，但明年一月已先有大搞作。
港交所（00388）行政總裁周文耀明年一月十五日榮休，蔡太早前已透露話，已經暫定明年一月十二日喺中環大會堂，聯合其他四個證券組織（證券學會、證券及期貨業職工會、網上經紀協會、專業財經分析及評論家協會），為周文耀餞別。