除了假期因素外，美元創下自今年四月以來表現最強嘅一周，加上資金流有逆轉迹象，乃近期股市疲弱嘅主要原因。事實上，美元弱勢已有一段日子，相信大戶們經已儲夠倉，可以隨時藉美元上升而喺股市及高息貨幣淡倉中獲利。唔經唔覺，恒指已較今年高位回落逾兩千點，理論上，港股回落到19,000至20,000點水平值博率才較吸引，故若然手頭唔係咁多貨，可候兩萬點邊才分段入市。
上周初本欄推介嘅思捷（00330），上周四宣布向華創（00291）購入內地合營股權，其後股價被質至最低見46.1元，當日阿莊跟進了1萬股，可幸未負所望，昨日思捷股價一度反彈至51.45元，收市報50.7元，成交2.12億元，若短期企穩喺50元樓上，相信沽壓暫告一段落，可安心繼續持貨，等待明年業務復甦嘅來臨。
中國南車（01766）嘅對手中國北車即將發行A股上市，據講發行總數25億股，其中網上發行15億股，作價對應市盈率為四十九倍。目前中國南車A股市盈率約三十五倍，而H股較A股價格折讓約16%，若北車招股反應理想，照計南車股價具追落後條件，所以阿莊心思思又想翻兜南車，會視乎市況見機行事。
近日水務股表現堅挺，中國水務（00855）昨日一度高見2.88元，收報2.8元，升1.8%；光大國際（00257）曾高見4.14元，收報4.01元，升2.3%；北控水務（00371）報2.62元，升5.65%。阿莊相信，明年內地不少地區將調高水價，加上中央加快推動城鄉化發展，水務股有可為。本欄喺十二月八日推介過嘅北控水務，來年有望再獲注入資產，可逢低收集。
有望走出行業低潮
昨日股價逆市靠穩嘅，仲有中化化肥（00297）。由於今年上半年，全球化肥市場需求萎縮，價格持續下降，加上市場競爭異常激烈，中化肥期間銷量同比下降34%，至635萬噸，營業額降43%至125億元人民幣；虧損8.28億元，若剔除存貨跌價撥備和衍生金融工具之公允價值變動，純利為1.18億元，同比跌幅達90%。今年以來其股價表現明顯跑輸大市，正好反映業績表現。
其實，每個行業都有其周期性，化肥行業亦不例外，最重要仲係投資者懂得把握周期變化，作出合適嘅投資決定。由於下半年農產品價格普遍上升，農民願意多用鉀肥，相信對比上半年，下半年嘅業績表現有改善空間。展望明年，春耕前內地將公布進口鉀肥價格，待這個因素明朗化後，市場供需將會復常，化肥行業有望走出低潮，明年公司可望轉盈。
綜合各項因素，未來三個月係睇位收集中化肥嘅適當時候，一旦確認行業轉勢，其股價將具爆發力。