繼金管局總裁任志剛今年九月底榮休後，人稱YK的金管局副總裁蔡耀君亦會喺今年底正式卸任。尋日嘅金管局簡報會，係YK退休前最後一次公開露面，新任金管局總裁陳德霖亦專登出席向佢致謝。陳總話，過去兩場金融風暴中，香港銀行體系仍能保持穩定，YK居功至偉，認真畀足面。
退休後，YK希望可以發展吓自己嘅興趣，譬如修讀歷史，甚至學打鼓彈琴。不過，YK首先想作深層休養，即係乜都唔諗，每日鍾意瞓到幾點就幾點。
回顧過去，YK話難忘雷曼事件，不過數到最難忘，唔及當年海外信託事件，銀行監理處喺現場審查過程中發現銀行有問題，繼而將之接管，佢話整件事好有成功感。