本文重點
聖誕節將至，假期氣氛濃厚，展望本周，相信市況仍會反覆偏軟，除非有突發事情出現，否則預期月底期指會喺21,000點邊結算，相比起去年底恒指只有14,000點，都算有所交代。
上周指數有秩序地回落，至於早前熱炒嘅細價股，其累積跌幅亦都不小，皆因炒家都套現放假去了。若然投資者手上仍然有貨，應該止蝕離場與否，當然要視乎個別股份及股民本身嘅承受風險能力。
不過，阿莊就認為，若然本身沾手細價股嘅意圖只係跟風短炒，嚴守止蝕位係必須要有嘅炒股戒律。
高盛近日首次將內地酒店業納入研究範疇，預期經歷一段頗長嘅跌勢之後，明年中、港兩地酒店入住率將會進一步改善，每房平均日租看升，而隨着酒店需求增長，行業復甦有利提升估值。
受惠國策推動旅業
事實上，中央政府亦明確表示要搞好旅遊業，這個取態與繼續推動內需嘅策略一致，相信利好措施陸續有來。講開內地酒店業，喺內地專營星級酒店業務嘅錦江酒店（02006），今年完成資產重組，把旗下從事經濟型酒店業務嘅錦江之星轉讓予旗下A股子公司錦江股份，換來十一間星級酒店資產，二者釐清發展路向，投行評價尚算正面。
錦江主營嘅上海市，近幾年有不少新酒店落成，競爭白熱化，遇上去年金融海嘯，星級酒店出現供過於求嘅情況，房租走低，故見今年上半年錦江嘅業績亦現倒退。
不過，隨着刺激經濟政策到位，今年下半年酒店業基本上已回穩，明年上海世博，加上上海落實興建主題公園，這些都有利當地旅遊及酒店業前景，相信明年錦江嘅經營情況會有所改善，配合重組資產效益浮現，股價前景並不悲觀。
錦江股價由上月初高位2.69元，回落至上周五低位見2.1元，乃上升通道底部區域。以該股截至六月底止每股資產淨值約1.81元計，現價市帳率1.2倍，風險有數得計，只係考慮到市況較弱，短線可候挨近2元邊入場，明年目標見3元樓上。