本文重點
中央政府喺一周內連續三次高調評論樓市政策，並推「國四條」遏制高樓價，令市場憂慮調控樓市措施將陸續有來，內房股反彈曇花一現，並拖累整體市況，恒指尋日收報21,813點，跌271點，成交687億元。
中國西部大型工業集團重慶機電（02722），上季以來頻獲基金增持，股價慢火煎魚，穩步向上，相信係憑「西部大開發」及估值便宜兩大概念吸引長線投資者捧場。昨日該股逆市上升6.49%，收報1.97元，成交增至9,295萬元，不排除又有基金入場增持，照計呢架「順風車」搭得過！
雖然今年上半年工業需求不振，期內重機銷售額同比倒退11%至28億元（人民幣．下同），純利亦倒退21%至2.15億元。惟下半年內地刺激經濟方案措施逐步收效，旗下商用車零部件及電力設備業務受惠內需暢旺和鋼價穩定，相信下半年業績可逐步回復正常，全年計盈利將大致穩定。
未來重機會繼續積極發掘水力及風力發電項目等投資機會，而以其業務性質，理應受惠內地推出智能電網。此外，環保能源加快發展，亦有助帶動相關機械應用需求增加。
明年獲注資機會大
此外，市場一直憧憬，母公司重慶國際經濟技術合作集團會適時向重機注資，如無意外，明年落實注資行動嘅機會較大。
近月重機股價由1.5元水平升上2元關才現回吐，升幅超過三成。不過，以現價計，往績市盈率僅十倍，若明年盈利重拾升軌，預測市盈率僅單位數字，有條件進一步收窄跟同類股嘅估值折讓。難怪八月以來，包括GE ASSET、VP、Hamon及UBS等機構投資者紛紛入場增持重機，相信呢班大戶「無寶不落」，唔會單單睇嗰三成利潤就滿足，現價仍屬攻守兼備之選。