大仔接班呼聲高

魏應州接受《彭博社》訪問時透露呢個退休大計，佢希望多做四年，即係六十歲就退休，現在已經為接班人部署，佢有三位公子，大仔魏宏名同三仔魏宏丞都喺康師傅做緊主管。

其中大仔魏宏名接班嘅呼聲甚高，魏應州對呢位今年三十二歲長子，自小就悉心栽培。魏宏名由高中開始，一到暑假就會喺公司或者啲世叔伯嘅企業度實習，中學一畢業就去英國讀書，讀完碩士後，由於康師傅有好多日本合作夥伴，於是佢仲去埋日本早稻田大學進修日文添！○六年已經同青梅竹馬嘅陳鈺雯結埋婚，修身同埋齊家都做好咗。