仲有大半個月，就要同○九年講拜拜，相信年初無太多人可以預期，港股能夠由三月份低位，短短半年反彈接近一倍。同班證券行老友飯局，以為今年佢哋必定過番個肥年，重現魚翅撈飯的豪氣，誰不知現實同幻想又係兩回事，靠佣金維生的老友們，嘆道今年股市好睇唔好食，儘管銀行水浸，股市表現鯉魚翻身，但今年港股每日平均成交額僅得600億多些少，即使去年金融海嘯，旺三季衰一季，但整體仲比今年高兩成，因此證券行生意並唔係街外所想般好景，老友們擔心明年美國退市，港股成交會水瓜打狗，再唔見一截。

十月本地零售銷售創十四個月以來最大升幅，本地零售股繼續有追捧，尋日莎莎（00178）同卓悅（00653）兩隻化妝品股整固，輪到大快活（00052）、廸生（00113）、周生生（00116）發力，升幅介乎5.7至10.4%。

盈利可望強勁反彈

主攻百貨業、名牌手錶、珠寶鑽飾的廸生，突見火燒冷灶，睇番除咗下周三公布中期業績外，近排無乜新聞。今年六月廸生公布截至三月底止全年業績，盈利大幅倒退七成六，只得5,137萬元（拆開是上半年賺7,721萬，下半年蝕2,584萬），有趣的是海嘯影響下，去年十月至今年三月的銷售額不跌反升，有19.8億元，比上半年多6.4%，本來業績唔錯，只不過海嘯下業績唔好大家預咗，下半年蝕錢純粹係趁機將一些零售店舖固定資產作1.16億元的一次過減值，撇除此數，實質營業溢利只跌一成，有2.03億元。

證券行估計，在無特殊損失底下，今年廸生盈利會有2.38億元，較○九年大反彈，亦高過○八年的2.1億元，廸生現價4.23元，市值15.7億元，預期市盈率得7.4倍，手上有淨現金5.3億或者每股1.42元。業績前異動，看來是估值被過分低估的一次修正，預早炒上。由近期幾隻被低估的零售股業績後表現來看，筆者認為廸生現價值博率十分高。