今年荷包穩袋1.2億元新台幣（約2,910萬港元），榮登台灣綜藝主持一哥嘅吳宗憲，原本貴為寶島首位擔任上櫃企業董事長嘅藝人，但呢個位唔易坐，佢只係做咗一百六十七日，尋日就宣布唔玩嘞。
宣布唔做翔昇董事長
吳宗憲今年中擔任OTC掛牌企業翔昇嘅董事長，轟動全台，起初翔昇嘅股價只係5元（新台幣．下同），之後就飛升至14元。不過，翔昇嘅虧損持續擴大，舊班底走晒，搞到股價唔值5蚊。公司尋日舉行臨時股東會改選董監事，吳宗憲冇得玩，只係做大股東。
吳天王話董事會係佢嗌開嘅，一切係預料中。佢仲話「諧星最大嘅罪過就係唔好笑，董事長最大嘅罪過就係唔賺錢」。睇嚟，佢都好明白發生咩事。
