由大摩做保薦人，喺本月初掛牌嘅內房股—禹州地產（01628），過去兩周一直喺2.3至2.4元水平徘徊，但以大摩嘅牌頭，配合「海西經濟區」概念，相信呢隻股會有後着，可能等收夠籌先至開車，若然想冷敲內房股，呢隻新股可以多加關注。

放大圖片

放大圖片

另一隻可以留意嘅內房股，係方興地產（00817）。今年上半年，公司實現未計投資物公允值之純利為4.18億元，同比增長17%，表現唔錯。

方興喺上海北外灘航運聚集區嘅兩大綜合開發項目正積極施工，其中上海港國際客運中心項目寫字樓，已吸引不少大型企業簽訂銷售意向書，而上海崇明島、雲南麗江項目正按期推進規劃設計等前期工程。此外，今年六月底，方興成功投得被譽為「絕版黃金地塊」嘅北京市廣渠路15號地塊。

物業租賃業務方面，上海金茂大廈寫字樓出租率雖有所下降，但仍處於高水平，租金收入平穩；北京凱晨世貿中心嘅出租率及租金水平均理想。酒店業務方面，旗下上海金茂君悅大酒店，以及金茂北京威斯汀大飯店和王府井大飯店，喺當地高端酒店市場穩佔前列，位於深圳嘅金茂深圳JW萬豪酒店，今年初才開業，明年可較全面反映效益，另公司於海南三亞設有金茂三亞希爾頓大酒店及金茂三亞麗思卡爾頓酒店。

資產質素有保證

由此可見，方興嘅物業組合處於京、滬及海南等一線城市及重點旅遊省份，資產質素較佳，亦正由於公司專注做商業物業，受住宅市場政策不明朗因素影響有限。隨着京、滬等大城市加快經濟發展，以及酒店業務逐步走出海嘯陰影，其投資物業升值潛力優厚，未來更有望繼續獲得注入優質資產。

再看其股價走勢，本月上旬低見2.13元後展開反彈浪，已突破大半年嘅下降軌，畢竟現價較預測每股資產淨值仍有三成折讓，政策風險又相對細，順勢先下第一注，突破五十二周高位3.12元再加注。