本文重點
由於唔少大價股估值已不便宜，投資者將部分利錢轉戰快、靚、正嘅細價股，所以今日亦順勢揀隻細價股—華基光電（00155）。最近公司宣布，獲源暢高科技集團按每股0.136元認購6億股股份。同時，認購方獲授認購期權，可按每股0.152元再認購多3億股股份。
配股引發無限憧憬
今年六月，華基按每股8仙進行2供1。至於今次配股，原來認購者源暢與公司一直有業務聯繫。資料顯示，源暢喺內地嘅投資覆蓋整車製造、汽車零部件等業務，早前有消息指其擬於昆明建設以非晶硅太陽能製造、高效率混合電動汽車和電動自行車等項目嘅新能產業基地，究竟今次華基引入其作為股東，雙方會否喺新能源方面有合作，正是今次配股嘅吸引之處。
華基本身亦係做光伏業務，日後與源暢有進一步合作，係正路嘅猜想，惟公司本業尚在初步發展，仍然虧損，喺缺乏往績支持下，只能視為1隻炒股看待，落場短炒宜嚴守止蝕。
再看其股價，是次批盪後，未見有太大升幅，由於新股東有來頭，加上尚有認購期權，可再度增持股權，睇牌面只係等好消息落鑊大炒。以上周五收市價0.16元計，起步唔難見0.2元樓上，止蝕位0.14元。