本文重點
最近幾個人力資源機構都話，出年好多機構都會加人工。香港最大僱主之一嘅滙豐銀行，薪酬調整動向一直受市場注目，尋日呢個焦點問題拋畀滙豐亞太區主席鄭海泉，鄭大班話出年加唔加人工要等董事會決定，依家仲未知；不過佢強調，幾年前開始已無咗集體劃一加薪呢支歌仔唱，加唔加人工都係睇個別員工嘅表現，但係佢都補充一句，好員工一直都有加薪！
陳啟宗承諾分享成果
而恒隆地產（00101）主席陳啟宗尋日畀人問到相同問題，佢就話集團資金充裕，仲向員工大派定心丸，承諾會同佢哋分享豐碩成果。
雖然陳啟宗無明確講加唔加人工，但佢講明就算減薪都只限管理層，又承諾唔裁員，表現優秀嘅員工喺今年初更獲花紅，真係恨死好多打工仔。