中國證監會表示，截至十一月十二日滬深兩市嘅總市值已達到23萬億元（人民幣．下同），流通市值達到14萬億元，另截至十月底，機構投資者持股市值佔流通市值比重達到69%，並重申未來將致力推動公司購併重組。

近年本港多家紅籌企業都積極推動資產重組活動，透過優化資產提升效益，看來這個策略與國策一致。講開紅籌企業分拆業務上市，繼上月華潤集團分拆華潤水泥（01313）上市後，由中糧集團分拆出來嘅中糧包裝（00906）已於昨日掛牌，全日高位見7.05元，收報6.11元，較招股價升13%，冇令捧場客失望。

此外，招商局集團旗下嘅招商證券，將於今日喺上海A股市場掛牌，估計市值將超過1,000億元，乃繼早前光大控股分拆光大證券後，A股市場另一隻大型券商新股。

講開內地證券業，又令阿莊想起浙江滬杭甬（00576）。早喺四年前，滬杭甬因所託非人，投資5.87億元國債出問題，為了避免受損，硬着頭皮注資6億元拿下金信證券（現稱浙商證券）七成股權。

誰又估到，這幾年A股市場大翻身，滬杭甬無心插柳，投資浙商證券嘅回報令股東喜出望外，本來一家增長相對穩定嘅公路股，受惠證券業務貢獻顯著，○七年度純利急增46%至24.1億元人民幣，股價曾高見13元。

證券業務值得睇好

去年內地宏調，加上金融海嘯，滬杭甬整體業務受到影響。不過，如今海嘯已成過去，今年以來A股市場反覆回揚，滬杭甬旗下嘅證券業務復甦速度較快，從今年首季及上半年，旗下證券業務經營溢利貢獻分別為1.5億元及4.14億元，可得到印證。下半年至今，A股市場安度調整期，並已重現升勢，證券業務表現可以睇好。

另一方面，受惠4萬億元人民幣刺激經濟方案，公路業務亦開始加快復原，適逢今年底計重收費標準可望落實執行，展望明年車流量分流影響亦會減少，相信滬杭甬明年業績可重拾增長動力，現價估值具支持。

再看今年陸續有內地券商以「好價」上市，券商資產有價，相信未來喺條件許可嘅情況下，尋求分拆或出售證券業務，會係滬杭甬嘅大方向。公司呢項投資已立於不敗之地，分別在於要贏幾多先至走，其資產價值重估潛力不容低估。

滬杭甬股價自去年末季見底回升，今年七月底見高位8.38元後便進入調整期，考慮到基本因素及市況，現價具值博率，短線可喺6.5至8元水平炒上落，若確認突破七月高位，中線目標10元關。