性格會影響行為，當然包括投資買賣決定啦。

平均回報女勝男

講起投資，好多人第一個諗法都係男士會佔優，因為男士一般頭腦夠冷靜、心思又夠縝密，肯定叻過女士啦。點知實際情況完全相反，美國曾經有研究指出，女性嘅投資回報率，平均比男性高出1.4%，最主要原因係男士一般比較固執、要「Face」、冇耐性同埋好賭。呢啲特質，全部都係男士嘅死穴，亦都係投資嘅致命傷。好多時當某間公司出咗問題，股價係咁跌，男士或者會為咗「Face」問題，再加埋天生嗰種好勝心，死都唔肯止蝕，要等到股價跌到殘晒，先至會把心一橫將佢賣掉。

相反，女士唔逞強嘅性格，令佢哋嘅賺錢比率相對提高，而且女士可能天生鍾意Shopping，平時都會習慣格價，佢哋對價格嘅敏感度一般會較高。

控制情緒最緊要

話雖如此，好多女士天生較為細膽，喺大升市之中可能好早就賣晒啲股票，錯失大賺機會。總括嚟講，投資係個人性格嘅延伸，無論男士定係女士，都要清楚了解自己的性格缺點，好好控制自己嘅情緒，咁先可以在股海中克敵制勝。