本文重點
太子每日都睇聯交所資料，竟然發現有「金牌莊家」之稱嘅立法會議員詹培忠，申報喺呢個月十日突然持有百營環球（00761）1.82億股，即係成6.86%權益，但就無披露作價。太子即刻打電話質問佢點解買多隻殼都唔話畀太子知，但老詹今次就好口密，點都唔肯透露詳情。
股價昨升12%
由於今次老詹嘅百營環球持股，係由原來嘅零，一批變成6.86%。太子就聽聞，百營環球主席施展望，同「金勞詹」有啲錢銀瓜葛，江湖傳聞話今次可能係「以股代債」，仲話施展望都有意將股票還畀金勞詹，估計老詹今次增持百營環球，可能會有後着，或者仲會增加持股量。百營環球尋日收報0.206元，單日上升12.57%。
其實金勞詹都算係近年嘅「殼王」，高峰期曾沾手嘅上市公司多達20間，最近呢兩年半，沾手嘅有12間，早前賣咗5間，剩番7間揸手。