本文重點
今年香港樓市暢旺，但係卓能（00131）旗下位於油柑頭嘅樓盤—一號九龍山頂，由於未有售樓紙，無得食住個勢賣樓，主席趙世曾尋日同太子講起呢單嘢都好勞氣。趙公子話，個盤○七年底已經攞咗入伙紙，但由於興建之時曾經搬遷及損壞咗幾棵樹，地政總署拖咗兩年都唔批售樓紙；卓能試過提交種樹方案，又要求賠錢了事，但係地政總署就硬係冇回應。
售樓紙拖兩年未批
趙公子好感慨咁話，當年畢業後第一份工就喺屋宇署做，當時政府效率高好多，入則由一個人批晒，唔似依家要牽涉屋宇署、地政總署及城規等部門，各部門各自為政之餘，官員又抱住「唔批唔錯」嘅心態，拖慢晒項目進度，中小型發展商「牙力」唔夠，生意難做。
趙公子直言，對於香港政府效率今非昔比感到「灰心」又「痛心」，未來都無乜信心再喺香港搞地產，寧願將投資重心轉移內地、澳門同馬來西亞。佢又話，公司業務對香港嚟講亦都微不足道，但見微知著，如果港府繼續咁樣嘅工作效率，香港只會愈嚟愈無競爭力。