今日係黑色星期五，唔知淡友會唔會乘機踩多腳。雖然指數權重股回氣，但大把股仔炒到出煙，志強所持國美（00493）破位而上，當然繼續持有等食大茶飯。中國水業（01129）升不穿0.3元，故以每股0.275元先計數，但仍會列入觀察名單，因北控水務（00371）勁升，中國水業遲早追落後。華基光電（00155）走勢麻麻，但股友話有後着，要有耐性坐貨。
花樣年（01777）招股，得到一眾富豪捧場，全靠英皇證券（00717）穿針引線，為花樣年引入一班大孖沙基礎股東。英皇證券近日在新股包銷市場表現積極，近期最矚目的新股恒大地產（03333），英皇證券也擔當重要角色。英皇證券每股資產淨值為0.59元，現價折讓22%，而集團每股持淨現金0.315元，現價可以話極為偏低。
有消息指，內地有銀行染指本地證券業務，尤其對上市集資及融資活動有興趣，有意收購本地具知名度的證券行，實行要跟外資行爭一日之長短。英皇證券最近在包銷活動省靚招牌，吸引力大增，難得PB唔夠一倍，真係抵買到極，被視為收購目標亦好合理，值得多加留意。