尋日史提芬掛住叫看官小心中策（00235）及中芯（00981），唔記得講番港交所（00388）份第三季成績表，這間可能是香港最獨市，又透明度最高的公司，第三季賺咗12.74億元，比去年升33%，如果睇番同期大市成交只得5%增長，去到667億元，有咁嘅成績算唔錯，由成績表中可以見到，季內港交所成本控制以至投資收入表現都十分理想。拆開計，港交所首兩季分別賺8.34億同13.66億元，連同第三季的12.74億元，累積賺34.75億元，大約係去年51.26億元嘅三分之二。依家已經係十一月中旬，港股成交仲係七百億元多少少，看來全年業績倒退在所難免。

港交所不宜睇太淡

港交所現價往績市盈率29.3倍，○九年預期市盈率31.3倍，係咪貴則見仁見智！同千多二千億成交的○七年輝煌歲月比較，目前港股成交額確實偏低，銀行結餘破紀錄，看來對股市交投沒有直接影響，倒過來說，亦可以話今日港股未有耐去到癲嘅境地，如果以港交所掛牌後歷史平均市盈率29.1倍比較，現價唔算太貴，始終獨市生意，估值爛船都有三斤釘，睇得太淡，隨時又會被殺個措手不及。

尋日推介霸王（01338），結果做咗逆市奇葩，股價又創新高，令筆者想起中國旺旺（00151）。

同霸王一樣，旺旺中期業績都令捧場客幾掃興，上半年營業額升12.5%，純利不升反跌，比○八年同期減少6.4%去到1.21億美元，管理層歸咎於今年春節假較早來臨，分銷商提早入貨，令銷售在去年業績已反映。其實以毛利升近16.7%，已知旺旺最後出來數字稍低於預期屬非戰之罪，事關去年同期分別有出售物業收益及匯兌收入560萬及1,750萬美元，計埋兩條數，其實上半年仲有超過一成增長。

今個月，旺旺有明顯追落後情況，由悶足半年的4.5元起步，短短幾日升幅近兩成，有大行認為旺旺返台以TDR掛牌，吸引資金流入，但筆者相信下半年內地零售市道明顯升溫，旺旺以落後內需股身份被追捧，更有說服力，始終要搵知名度高、又擁有全國銷售網絡嘅大眾消費類股份，唔係康師傅（00322）、統一（00220），就自然諗起旺旺。

估值勝統一康師傅

旺旺一○年市盈率23.8倍，剛夾在康師傅的29.5倍及統一的18.8倍之間，但市場對一○年的預測盈利增長，旺旺係27.2%，康師傅同統一分別係20.9%及14.9%，兩者結合比較，PEG（市盈率/增長率）唯一低過一倍的旺旺，仲係比較落後。