本文重點
《胡潤百富榜》大家聽得多，其實仲有一個《胡潤套現富豪榜》，今年已經係第三年發布，而○九年「套現王」就係李兆楠。呢個名好似有啲陌生，其實佢就係有「亞洲股神」雅號、人稱四叔嘅恒地（00012）主席李兆基細佬，亦即係五叔嘞！
根據《2009胡潤套現富豪榜》統計，五叔今年減持平安保險（02318），總共套現咗65億元人仔，佔成個榜25位富豪套現總額達20%。有人猜度五叔其實係代佢阿哥四叔揸平保嘅股票，孰真孰假唔知，不過太子記得，四叔近排經常叫人「見利勿忘」，即係有錢賺時記得沽貨獲利，相信五叔喺呢方面都甚得四叔真傳。
榮智健套15億上榜
除咗五叔，上榜嘅富豪當中，以陳發樹較為港人熟悉，佢今年就沽咗唔少紫金（02899），套現8億元人民幣。另外，榮智健就透過減持中信泰富（00267）同保利香港（00119），套現咗15億人仔。另外，今年升得好誇張嘅藍籌騰訊（00700），公司主席馬化騰亦唔執輸，趁高減持股份套現咗6億銀人仔。