本文重點
雖然昨日仍屬升市，但部分近日熱炒嘅細價股出現疲態，高開低收。反而，中資汽車股臨尾市大發神威，慶鈴（01122）升32%、華晨（01114）升14.9%、東風（00489）及駿威（00203）同升逾5%、吉利（00175）升7.5%。相比之下，長城汽車（02333）表現落後，且看短線能否衝穿10元大關。
早前唱好聯想（00992）嘅高盛，最近竟然發出報告，話睇淡聯想短期嘅股價，理由係預期聯想明年嘅毛利率表現疲弱，股價存在季節性等不明朗因素，但就強調以十二個月計，仍然對其股價表現感到樂觀，故只係將其投資評級由「確信買入」名單中剔除，並且改為「買入」。
阿莊相信，大戶們尚未收夠貨，唔排除會藉明年首季銷售淡季，壓低股價收貨，情況等同今年次季嘅表現。但阿莊再次重申，對聯想前景具信心，若股價回落至4元樓下，還會考慮加注。
內地上月底順利推出創業板，下一個目標係喺明年上半年推出國際板。滙豐控股（00005）幾可肯定成國際板首批上市股份，作為中線投資，股價喺80至90元水平，正股及相關購輪及牛證均具留意價值。
再生能源股齊起哄
美國總統奧巴馬將於下周訪華，中美兩國領導人一個重要話題，乃共同推動環保及再生能源發展，昨見部分再生能源股開始有異動，陽光能源（00757）升7%、保利協鑫（03800）升2.5%、卡姆丹克（00712）一度高見2.02元，收報1.93元，升3.2%，相信未來一、兩周呢類股升浪將進入「戲肉」，可以順勢
實隻興業太陽能（00750）。
興業在內地從事幕牆及安裝服務建築工程，亦兼營薄膜光伏建築一體化系統設計、製造及安裝，其中包括從事樓宇及建築物光電技術與建築設計嘅一體化，以及將太陽能轉化為可用電能，並生產及銷售太陽能產品，故雖屬建築出身，但亦屬不折不扣嘅再生能源股。
今年上半年，興業收入同比增長34%，至5.03億元人民幣，純利5,314萬元人民幣，大致持平。論經營規模仲未算太大，但按正路發展，主營業務食正環保大浪，再計落現價估值亦唔算太貴，股價走勢亦對辦，昨日股價異動，亦有交投配合，若然嚟緊相關板塊股真係大規模異動，此股目標上試4至4.2元阻力區，穿3.15元止蝕。