阿莊手持嘅北京控股（00392），昨日突破50元大關，收市報50.75元，升5.7%；蒙牛乳業（02319）走勢亦偏強，收報23.3元，升0.2元；中航科工（02357）一度高見3.4元，好戲在後頭；中國鐵鈦（00893）現獲利回吐，收報4.66元，會再睇多幾日。

上周阿莊講過，內需概念當炒，飲料股有資金流入，青島啤酒（00168）昨日升4%；同係啤酒股嘅金威啤酒（00124）亦見異動，上周五成交及股價均急升，而昨日亦企穩喺1.4元水平樓上。

青啤貴為內地啤酒業龍頭大哥，估值較同類股有溢價，唔算特別，現價往績市盈率約六十倍、市帳率高達6.9倍，但股價升勢仍然停不了。至於金威啤酒，過去兩年受到擴產影響，加上廣東省啤酒市場競爭激烈，以致業績見紅，惟經過前年供股過後，加上擴產項目陸續完成，財務狀況已見改善。

更重要係公司已一改策略，積極拓展廣東省以外嘅啤酒市場，成效漸現，今年上半年公司已回復盈利，全年可望扭虧為盈，現價市帳率僅0.87倍，值博率高。

金威不愁炒作藉口

再看近期紅籌股輪流「燒炮仗」，越秀投資（00123）、北控、廣南（01203）都係例子，金威母公司係廣東省政府旗下嘅粵海控股，係不折不扣嘅紅籌股。博畀人購併、博業績大翻身、博估值太低迷，吸引資金炒落後也好，要炒應該唔愁藉口，可以實交投，首站先睇每股資產淨值1.68元。

回說新股，聽賓架講，由於民生銀行嘅招股價範圍務實，加上又係第一隻上市嘅民營銀行，相信認購反應唔錯咁話。有內地銀行招股上市，現成嘅六行亦可以多關注，呢個理由簡單不過。事實上，昨日內銀股表現亦唔錯，建設銀行（00939）及工商銀行（01398）同升逾3%、交通銀行（03328）及中國銀行（03988）亦升逾2%。

工行今年首三季度業績勝於市場預期，投行評價甚高。近期市場唔少有關明年全球經濟走勢嘅預測展望，主流意見都係睇好明年內地經濟。工行憑着強勁嘅資產負債表及盈利能力，可繼續獲得投資者青睞。

再看股價走勢，工行昨日收市報6.66元，升3.1%，走勢已呈突破，短炒長揸都有作為，季內目標見7.4元，止蝕位6.3元。