最近新股排隊上市,太子尋日見到理文造紙(02314)嘅CEO李文俊,問吓佢近期有冇抽新股,太子記得佢○六年曾經入飛認購新股,但佢話近排好忙,專心搞好公司業務,好少留意新股,寧願留意吓自己公司嘅股價。
最緊要搞好公司
太子記得,○六年新股當旺,有唔少富豪去認購,李文俊亦有入飛認購建滔化工(00148)分拆出來嘅建滔積層板(01888),當時李文俊話自己同建滔化工主席張國榮係朋友,所以捧場。
不過,今年建滔化工計劃分拆煤化工業務上市,李文俊話無時間睇新股,所以唔會捧場,專心做公司業務。
佢又預告,公司會做多一類型嘅紙張,今年底會推出自己品牌嘅A3及A4紙張。