音樂會開場前，太子就畀國壽（海外）副董事長兼總裁劉廷安嚇咗一跳，因為佢致辭時竟然全程用廣東話，而且講得唔錯。佢果然不負董事長楊超對佢嘅期望，好快就融入咗香港社會，相信楊董都唔會咁快調佢返內地。

楊超「警告」半年要識講

劉總曾經自爆話，楊超舊年派佢落嚟香港時，曾經笑住「警告」佢，如果佢半年之內唔識講廣東話，就要調佢返內地。

呢段日子以來，太子見劉總好畀心機融入香港。第一張成績表係業務快速增長，佢哋今年上半年保費增長咗三成，新單保費收入嘅增幅更加打入三甲。相信投資方面嘅成績更加好！

第二張成績表係成功重塑國壽喺香港嘅形象。以前港人淨喺識得2628，唔炒股嘅人就唔多知國壽原來喺香港都有保險賣。經過劉總一番重整後，依家姚明代言嘅廣告牌已經通街見到嘞。