子彈火車打垮日航

講開日本，我最近就喺報紙上見到有關日本航空公司（JAL）嘅消息，依家日航開始同官民合資的「企業再生支援機構」（ETIC）進行初步磋商，尋求重組業務。其實日航已經連續四年錄得虧損，過去十年亦都三次獲得政府資助，主要問題係日航有龐大嘅退休金開支，同埋面對住子彈火車嘅強大競爭。去過日本嘅朋友都話，日本嘅鐵路網絡非常方便，計番時間（包括辦理登機手續及候機時間）同埋價錢，搭子彈火車仲好過搭飛機，難怪日航生意咁難做啦！

睇番中國，舊年年底公布嘅4萬億元人民幣刺激經濟方案，基礎設施佔咗主要部分，其中鐵路嘅投資更係重要。南方航空（01055）董事長司獻民就喺北京的一個行業大會上公開話，提高中國全國高鐵網絡將嚴重打擊航空業。他希望政府能提供減稅優惠去協助航空公司減機票票價同高鐵競爭。睇番目前南航一百六十條國內航線中，有三十八條與高鐵存在競爭；再從航空公司收入比例觀察，南航受高鐵影響確實係最大，上半年國內客運收入佔整體客運收入高達85.5%；國航（00753）同東航（00670）嘅相關收入比重都係六至七成左右。最弊仲係盛傳高鐵票價會比機票平成一半有多，唔怪得南方航空啲管理層咁緊張啦！

想投資航空股嘅朋友，就要小心留意內地航空業嘅進一步發展，如果政府唔出招幫吓航空股，睇嚟佢哋嘅股價都好難再「起飛」，隨時變咗做「夕陽股」，同日航落得相同命運。

洪龍荃