本文重點
對於有錢人來講，富貴可能真係有如浮雲。《福布斯》雜誌近日除公布新一年嘅《美國超級富豪榜》外，仲將一班富豪嘅財富形象化，等大家較易想像到呢班富豪究竟點有錢。
蓋茨買得起哥斯達黎加
雖然話一班美國富豪嘅身家因金融海嘯而縮水，但係佢哋嘅財富仍然富可敵國，並唔係話等於幾多架私人飛機咁小兒科。好似首富蓋茨，據《福布斯》計算，佢500多億美元嘅身家，已超過140個國家嘅GDP，可以買成個哥斯達黎加。
至於排第二位嘅股神巴菲特，雖然身家縮水到只有400億美元，但已經差唔多買到成個北韓。至於索羅斯所擁嘅130億美元，足以買下舊年因金融海嘯而破產嘅冰島。
近日內地大型發展商恒大地產（03333）上市，即刻令其主席許家印進身中國首富嘅前列位置，唔知《福布斯》稍後會唔會以另類嘅方式去幫一班中國富豪計吓身家呢？