息口始終太低，人人爭住為手上閒錢搵出路，尋日唔少逆市奇葩，有消息、有概念的可真是無懼跌市。向母公司賣掉流血不止的中華牌轎車的華晨（01114）再升25%，收報1.81元，消息公布後兩個交易日升四成，較史提芬上月中推介時更升八成之多。

建滔化工（00148）是本地工業股中，比較少見的異數，過往以生產電子設備必需的印刷線路板起家，其後再涉足覆銅面板及化工業務，全部都幹得有聲有色，為首兩項核心業務，更先後獨立上市，市場共識是，當甲醇及醋酸等化工生意營運成熟（上半年佔整體分部業務貢獻約18%），也會有自立門戶的一日。

連環套現料有動作

最近建滔有兩個令人相當意外之舉動，先是減持建滔積層板（01888）的股份，以每股4.92元配1.6億股，套現7.67億元。講意外，唔單止係因為建滔本身坐擁近36億現金仍然賣仔，亦因為配股價比○六年上市價7.73元低三成六，當日接貨者有被賣豬仔之嫌外，亦大大影響芬佬對電子消費品市場下半年復甦，可以刺激覆銅面板需求的預期。

另外，建滔又突然宣布分拆生產焦炭及焦炭相關產品的河北煤化工在主板上市，即使通告未有詳列分拆規模，但由整體煤化工的收益看來，「晒士」大極有限，唔等埋其他化工項目一起包裝上市，對一直以來財技出色嘅建滔來說，有點教人摸不着頭腦。

或染指內房業務

唔係等錢使嘅話，相信建滔連環套現及分拆活動後，極可能有大動作跟尾，早前斥資15億元人民幣買下上海地皮發展房地產項目，並興建寫字樓大廈收租，看來火紅的中國房地產生意，經已令一直安分守己的「廠佬」心動，有意染指分一杯羹。過往印刷線路板、覆銅面板到化工投資，業務有別，但基本上都性質相同，染指資本密集的地產投資，能否一樣成功，股民不妨拭目以待。不過毫無疑問的是，企業投入與本業毫不相關的新業務初期，股東風險唔多唔少會增加。