踏入十一月，又到咗預測明年經濟走勢嘅時間。金融大鱷索羅斯表示，全球經濟復甦可能失去功能，要提防雙底衰退。另一方面，中央經濟工作會議將於下月初喺北京召開，屆時又會循例回顧過去一年嘅經濟表現，並預告明年嘅經濟工作方向。
退市措施短期難落實
阿莊相信，以目前嘅經濟狀況，未許各國政府話「退」就「退」，退市最快係明年中以後嘅事，大家毋須自亂陣腳。
內地創業板廿八隻首發新股中，昨日漲停嘅只有一隻，另有廿隻跌停。有指今次創業板會重演○四年六月中小板嘅情況，即掛牌首日急漲，之後三個月進入「去泡沫化」過程，股價不斷探底。總而言之，創業板跟主板係兩個完全唔同嘅市場，其升跌對主板後市去向沒有直接影響。
講起新股，港股方面，禹洲（01628）昨日掛牌，高位見2.72元，收報2.68元，較招股價微跌0.7%，睇勢要收一浸貨先至行。另外，在本周四上市嘅恒大地產（03333），有多位猛人入飛捧場，相信掛牌會有好表現。
十月上旬掛牌嘅中國鐵鈦（00893），喺招股價3.5元水平橫行近三周後，上周四終見異動，昨日係第三個交易日上揚，收報4.28元，升5.6%，係典型收齊貨就開車嘅例子。
咁啱昨日港交所（00388）嘅披露權益資料亦顯示，基金景順喺上周三（即「開車」前一天），按平均價每股3.55元，增持中國鐵鈦1,257萬股，持股量由4.43%升至5.06%。近日該股股價和交投俱增，看來事必有因。
中國鐵鈦係四川第二大鐵礦石礦場營運商，在私營營運商中則為最大，旗下礦場嘅礦石為釩鈦磁鐵礦，用於生產鐵礦石產品及鈦產品，主要客戶為鋼鐵生產商，以及與鈦金屬相關嘅下游產品生產商。
國策有利產品銷售
近年中國政策發展明確要求喺建築工程中使用高強度鋼鐵，特別係四川大地震之後，中央政府頒布關於中國建築工程抗震設防標準，提高建築工程所用鋼鐵強度標準。
由於釩有助提高鋼鐵嘅強度和硬度，高強度鋼材需求上升，將會刺激對釩及釩副產品嘅銷售。
中國鐵鈦IPO招股反應熱烈，但掛牌後三周股價唔上唔落，都知道事有蹊蹺，如今睇嚟，唔排除有大戶攞唔夠貨，逼住要喺市場買入，故極力壓價，待收夠籌先炒上。股價連續三個交易日大升過後，相信「開車」訊號已鮮明不過，照計班大戶唔會志在一蚊幾毫嘅升幅，可以搭轉順風車，料快見5字頭。