本文重點
近期，最多人茶餘飯後討論的問題必然係「樓市」。恒地（00012）旗下干德道「天匯」項目，每平方呎賣到成7萬幾蚊，香港豪宅市場已經由內地熱錢支配，內地同胞唔怕「買貴」，最怕樓盤唔夠「豪」。睇番樓價，由舊年雷曼爆煲嗰日開始計，金融海嘯過咗一年多啲，樓價已經差唔多返到海嘯之前的高位，身邊唔少廿歲附近嘅朋友都話樓價咁貴，畢業之後都唔知要等到幾時先儲到首期，享受吓做業主嘅滋味喎。
相對價值影響價格
而特首最近亦都被問到樓價係咪過高，佢即刻話：「豪宅售價上升唔會影響一般樓宇價格，普通市民唔使太過擔心。」特首呢個講法，邏輯上絕對無錯，不過佢就忽略咗資產價格存在住相對價值（Relative Valuation）的問題。
舉個例，假如你原先放盤賣一個700呎的單位，每呎賣5,000蚊，掛盤350萬。點知屋企附近最近起咗個豪宅項目，每平方呎賣到成2、3萬幾蚊，一個700呎的單位埋單計數最少要幾千萬。你估你收到風之後，會唔會即刻打畀個代理話要加價賣盤？我估計大部分人都會加價。
將相對價值套番落投資市場其實一樣用得着，好多時同一個行業內會有幾家公司上市，假如龍頭股預先上升，大家不妨留意吓佢其他同行，睇吓佢哋啲股價有冇變動，如果冇特別升幅的話，可能係一個良好的買入機會。
洪龍荃