近日積奇睇中一隻半新股，就係招股時反應一般的神冠（00829）。神冠招股反應未算熱烈，不過掛牌之後走勢卻夠晒搶眼，首日見一見3.8元，比招股價3.1元高兩成三，之後經已絕塵而去，最低見過4.04元，最威去到4.82元，尋日市跌佢唔肯跌，倒升0.04元，收報4.38元，相信熱錢見跌市無嘢炒，開始向這類貨源歸邊的半新股埋手。

神冠主要業務，係以食用膠原蛋白製作腸衣供應香腸製造商，環顧股場，完全無直接比較對象，然而祖國人民收入不斷改善，副食品市場潛力不容忽視，單睇雨潤（01068）的包裝冷凍豬肉，銷售年年高速增長，可知一二。

這亦解釋到點解施羅德基金，在神冠一掛牌經已在市場密密吸納，現價預期市盈率二十二倍左右，以過去幾年增長都算合理，加上成交配合，炒作應該未完，大膽估計有機會破頂見5元，除非穿4.2元，先諗止蝕。