回望九月下旬，美匯指數都曾作反撲，由75.83反彈2.2%，去到77.47，當時一樣無甚麼特別利淡消息，港股卻由高位21,930點插落20,535點，跌咗1,395點，以尋日即市低位21,134點計，過去三日港股高低位相距1,456點，同上次睇齊。儘管美元強勢，但早兩日公布的十月美國消費信心及九月份新屋銷售，都是差強人意，聯儲局要在一年半載內退市，談何容易！史提芬睇唔到美元短期有轉勢可能，估計今次美元升股市跌，是又一次警鐘誤鳴的機會高於一切。

批股非關資金壓力

玖龍紙業（02689）以每股10.85元批股集資28億元減債。一直以來，唔少市場人士都認為，玖紙過去幾年為擴大市佔率，財政上是過於進取，當去年爆發金融海嘯，內地出口萎縮，紙箱及紙張需求下滑，一方面要面對銷售下跌的衝擊，另一方面折舊及利息開支大增，玖龍即時四面楚歌。

回顧歷史，玖龍○五至○九年（六月結）銷售額由48.3億元升至131.3億元（人民幣．下同），升咗1.72倍，同期總負債由62.5億元增至138億元，增長1.2倍，低於銷售額，簡言之，貸款增長幅度低於銷售額，唔算過分。

中央為保八，今年大量放水，玖龍貸款要獲續期應該毫無難度，選擇現在批股，相信係睇中今年股價累升唔少（經過尋日一插仲有3.87倍升幅），多於有急切現金需求，○九年下半年賺13.4億元，破晒紀錄，但並非因銷售勁升，反而係紙漿價回落幅度高於產品價格所致，相信高毛利情況下半年開始會逐步修正，預期市盈率19.5倍左右，低過歷史估值一成，合理但短期恐怕再升水位唔多，如果未來消化批股壓力，回到9.5至10元，入市勝算會較高。