聯通近日公布於十月三十日晚上六時至三十一日凌晨六時，喺北京嘅「世貿天階」舉行iPhone手機進入中國市場嘅首銷儀式，不過老實講句，內地嘅水貨iPhone一早入咗去，而且聯通版iPhone又無WiFi功能，仲要唔係平過人，所以市場並唔係咁睇好聯通版iPhone嘅銷情，太子唔覺得奇怪。

簽約兩年捱貴Plan

但咁辛苦爭個代理權返來，聯通絕對唔會咩都唔做，聽講，聯通聽日會採取限量方式發售，用戶只能買到999部iPhone，大鑼大鼓咁宣傳，先至賣得900幾部，實製造到個搶購熱。咁都仲未止，內地媒體尋日引述消息人士透露，話聯通聽日會開始向內部員工配發iPhone，聽講內部員工價係免費，大家都以為聯通咁益班員工，但後來睇真啲，聯通係要員工簽約兩年，而且仲要每月承諾用186蚊人民幣嘅高月費計劃添，咁樣搞法，聯通版iPhone嘅銷情差極都有限。