豪宅過1萬蚊呎都唔係好耐之前嘅事，估唔到短時間更創出7萬蚊呎世界紀錄。煲呔在施政報告大談樓市，刻意將豪宅同普通住宅分開，希望消減市民對豪宅炒風擴散的怨氣，可惜愈描愈黑，市民對政府高地價政策，牽動高樓價的不滿情緒反彈得更高。金管局新任總裁陳德霖都認真識做，證實向本地銀行發出指引，要求2,000萬元以上物業按揭比例，由七成降至六成。

今時今日，200萬元以下物業畀100蚊印花稅就得，但超過600萬物業要畀樓價3.75%，連各類佣金及律師費，炒豪宅5至6%升幅根本都只係平手離場，豪宅交易成本高昂，客觀條件上對投機者造成一定限制。況且買得起2,000萬元物業，有幾多係要借到盡嘅打工仔（七成按揭每月供款要7萬蚊，銀行一般要求月薪在20萬以上，應佔香港受薪人口不到0.5%），大家心知肚明。美其名，今次政策避免加息周期開始，銀行按揭風險增加，實際又係政府為豪宅炒風擺擺姿態，做個政治騷，兼畀張櫈仔煲呔行番落個台。

市場憧憬海嘯後，電腦及手機市場今年開始步入復甦，而微軟新視窗推出，估計也會刺激個人電腦出貨量。年初至今，最大液晶顯示屏生產商冠捷（00903）升112%，內地個人電腦生產商聯想（00992）升121%，手機代工一哥富士康（02038）升185%，手提電腦機殼生產商巨騰（03336）升308%。

拓新業務在在需財

全球五大液晶顯示屏生產商之一的唯冠（00334），與華冠簽合作備忘，發展近年大熱的LED屏幕及太陽能電池，周五勁升三成，但睇番年初至今累積升幅不過100%，在同行中都算執輸。落後當然有理由，經營上，唯冠的確不及同行冠捷，至少後者在上半年逆境中，總算仍有利潤。執筆時唯冠成績表仲未曝光，但由早前盈警，已打定輸數。

顯示屏生產屬資本密集行業，加工利潤又低，供應鏈控制唔好，業績都難有起色，唯冠○八年業績見紅，○四至○七年，生意額介乎87億到162億元，純利只得2,600萬至1.8億元，純利率0.2至1.7%，低得可憐。

集團上半年勁蝕13.2億元，幾乎將股東資金一鋪清袋，由13.7億跌到4,100萬元，仲未計下半年！能唔能夠靠當炒的太陽能概念及LED Panel起死回生，雖仲係未知之數，但周五火燒冷灶確係惹人垂涎，不過要小心新計劃即使一片光明，唔伸手都係無水大搞也。